da lenghe.net

PRE TONI BELINE INTUN LUNARI PAL 2010
INTE SUAZE DI UN PROGJET DI BENEFICENCE

Sabide ai 7 di Novembar te glesie di Visepente, aes cuatri sot sere, al vignarà presentât il lunari 2010 dedicât a Pre Toni Beline. Realizât pal tierç an par cure di Alida Pevere e Cristian Liberale, al cjape dentri cetancj strucs dai plui biei e profonts pinsîrs di chest predi, fotografiis sôs e di famee, une preiere e poesiis dal stes Beline e dai poetis Gloria Angeli, Giacomina De Michieli, Ciro Di Gleria, Lucina Dorigo, Giuliana Pellegrini, Alida Pevere, Celestino Vezzi, Domenico Zannier, Sergio Zannier. Il ritrat di cuviertine al è stât realizât de artiste Marina Coccolo.

Ae presentazion a intervignaran a ricuardâ il tradutôr de Bibie in marilenghe: Pre Romano Michelotti de Associazion “Glesie Furlane”, Pio Bellina, fradi di pre Toni, Guido Sut e Celestino Vezzi che pe ocasion al puartarà ancje une video interviste fate a pre Toni in colaborazion cun Video Tele Carnia, la emitent che lu à simpri seguît cun interès e afiet.

La finalitât di chest lunari, oltri al ricuart, e je chê di continuâ une opare di beneficence tacade propit di lui: fâ poçs di aghe e scuelis in Cueste d’Avori e Benin. E al è propit cu la proiezion di un filmât di Danilo Pigat, ae fin de serade, che al vignarà fat il rindicont des oparis realizadis in Afriche cul rigjâf dal calendari di chest an.

Chest lunari al è stât patrocinât di diviersis associazions e sostignût cun promesse di compre de bande di sengulis personis che lu àn prenotât in anticipi permetint cussì la sô realizazion.

Daspò la presentazion si podarà cjatâlu te edicule di Visepente, in chês dai paîs dongje e di Colorêt di Montalban.

fonte: http://www.lenghe.net/read_art.php?articles_id=1755&PHPSESSID=0721331d7c8a2ff27c69941154d5060b