PRE TONI BELINE NUS À LASSÂTS

PRE TONI BELINE NUS À LASSÂTS
AL DISCOMPARÌS UN GRANT PERSONAÇ DE CULTURE FURLANE

Corot in dut il Friûl pe muart, te gnot passade, di pre Toni Beline, 66 agns. Natîf di Vençon, predi a Visepente, diretôr responsabil dal mensîl La Patrie dal Friûl, al è stât un dai grancj animadôrs de culture furlane fintremai tal orepresint. Al à voltât la Biblie par furlan, adun cun pre Checo Placerean, al è autôr dal cetant cjacarât libri “La fabriche dai predis” e di plusôrs tescj, ancje di poesie. Il funerâl al sarà celebrât miercus ai 25 di Avrîl, aes 5 sot sere, te glesie parochiâl di Visepente. Al sarà l'arcivescul emerit bons.Alfredo Battisti a dî la Sante Messe.
O publichìn ca il comunicât dal Comitât 482 dedicât a pre Toni.
 
Corot par pre Toni Beline
 
Vuê pre Toni Beline al torne tal grim di chê tiere che tant al à amât e che par jê cussì tant al à lotât. Tiere che no je dome un miscliç di elements inorganics, ma che e je cjar vive, formade di feminis e oms, cu lis lôr sperancis e lis lôr lagrimis, cu lis lôr faturis e cui lôr siums.
Al è dificil di cjatâ lis peraulis par spiegâ ce che o sintìn ta chest moment, pe pierdite di un om che nus à dât tant e, prin di dut, il so esempli. O speravin che al sarès restât ancjemò chi cun nô, parcè che al jere inmò plen di snait, parcè che al veve inmò tant di dî, e parcè che, in lui, la peraule e veve la fuarce de profezie. Magari cussì no, no je lade come che o varessin sperât. Pre Toni al è lât a fâi compagnie a Marchet e a Placerean, a Marchi e a Tellini. A di chei furlans che tant a àn dât e cussì pôc a àn vût de lôr int, che a àn mostrât a clâr che umii nol vûl dî sotans, che si àn batûts par che il Friûl al fos libar e Patrie di oms libars.
Alore, il miôr salût che o podìn dâi a pre Toni al è chel di no avilîsi e di no molâ, parcè che ancje chês bataiis che a somein di pôcs a puedin deventâ di tancj. Si trate, come che al à vût scrit, di “celebrâ lis gloriis di un Friûl vîf e no lis memoriis di un Friûl muart”. Nus tocje duncje ancje a nô di costruî il Friûl gnûf e sperìn di fâlu cu la stesse fantasie, cu la stesse creativitât, cu la stesse inteligjence e cu la stesse ironie di pre Toni.
 
 
Udin, 25/04/2007
 
 Il puartevôs dal Comitât 482
Carli Pup

fonte: http://www.lenghe.net/read_art.php?articles_id=1251&PHPSESSID=6